Sinigang ni Lola. :D

 Noong ako ay bata pa, isang beses sa isang linggo ay pumupunta kami sa bahay ng aming lola upang makapag sama-sama at magsalu-salo sa isang hapunan. Papunta pa lang ay nanabik na ang lahat sa iba't ibang putahe na maaring nakahanda sa hapagkainan. Kaldereta, Kare-kare at marami pang iba. Ngunit ang pinaka-aabangan at pinaka paborito ng lahat ay ang Sinigang ni Lola. 

Ang sinigang ni lola ay may taglay na asim na nagmumula sa katas ng sampalok, na siyang hahagod at mag-iiwan ng marka sa inyong mga lalamunan. Ang karne na siya namang napaka-lambot ay napakasarap nguyain. Ang mga gulay na sangkap nito, ay nagbibigay sustansya sa ating mga katawan kaya naman ang mga matatanda sa aming pamilya ay wiling-wili sa pagkain nito.

Napakasaya ng mga araw na iyon. Bawat higop ng sabaw ng Sinigang ni Lola ay nakapag-papaalala sa akin ng mga masasayang araw at ang pagkakatipon ng aming pamilya. Sa paglipas ng panahon at sa pagpanaw ng aking pinakamamahal na lola, ay hinding-hindi ko makakalimutan ang linamnam ng kanyang Sinigang at ang ligayang naipadama nito sa bawat isa sa aming pamilya.

- Isinulat ni: Chloe Gareth P. Gacayan

Seksyon: 1T3